Күндү оҕолор, төрөппүттэр уонна учууталлар!
“Бэлэм буол+” онлайн түһүлгэтэ оҕо кыратыттан саха тылын, дойдутун, култууратын билэ, киэн тутта улаатарыгар көмөлөһөр. Оҕо өйүн сайыннарар интэриэһинэй сорудахтардаах, дьарыктардаах, оонньуулаах тургутуктара эһиэхэ өрүү күүтүүлээх ыалдьыт, эрэллээх доҕор буолуохтара.
Эһиги оҕоҕут төрөөбүт тылынан саҥарар, өбүгэлэрин ытыктыыр, чөл өйдөөх-санаалаах, эргиччи сайдыылаах буолуон баҕарар буоллаххытына, оччоҕо айаммыт суола биир эбит. Бииргэ элбэҕи ситиһиэхпит!
Биһиги сорукпут
Оҕо оскуолаҕа төрөөбүт тылын, Сахатын сирин туһунан ылбыт билиитин үксэтэргэ, саха тыла туттуллар эйгэтин кэҥэтэргэ. Саха оҕото төрөөбүт тылын билэ, төрөөбүт Сахатын сирин таптыы улаатарыгар эһиэхэ эрэллээх көмөлөһөөччүгүт буолуохпут.
Биһиги түһүлгэбит уратыта
“Бэлэм буол+” түһүлгэтэ оҕо математикаҕа, саха тылыгар уонна литературатыгар, төрүт култуураҕа уонна тулалыыр эйгэҕэ билиитин хаҥатар, оскуолаҕа үөрэтиллибити чиҥэтэр. Манна баар онлайн толоруллар сорудахтар саҥардылла туруохтара. Өйү эрчийэр сахалыы дьарык оҕо толкуйун, санаатын сааһылыырын сайыннарар.
Сорудахтары оҕону үөрэтиигэ уопуттаах учууталлар бэлэмнииллэр, оттон ойуулары уруһуйдьуттар, дизайнердар оҥороллор.
Тургутуктар үөрэнээччи сааһын, сатабылын учуоттаан оҥоһуллаллар. Дьарыктар дьэрэкээн ойуулара оҕо болҕомтотун тардыаҕа. Толоруллубут тургутук тута сыаналанан, түмүгэ туоһу сурук буолан онлайн тахсар.
Тус хоско суруттарбыт үөрэнээччи түмүктэрэ барыта онно мунньуллан иһэр. Ити төрөппүттэргэ, учууталларга эмиэ интэриэһинэй буолуоҕа.
Тургутуктары толорууга төрөппүттэр, эбэлэр, эһэлэр кытталлара, оҕону эбии үөрэтэллэрэ хайҕанар. Оттон олимпиаданы оҕо бэйэтэ толоруохтаах. Ити билии таһымын бэрэбиэркэлиир.
Аныгы саха оҕото өркөн өйдөөх, булугас толкуйдаах, ситимнээх санаалаах буола сайдарыгар биһигинниин бииргэ буолуҥ! Билиини кынат оҥостон олох үрдүк чыпчаалларын тэҥҥэ дабайыаҕыҥ! Түһүлгэбит сылтан сыл сайдан, кэҥээн саха тылын туттуллар эйгэтин кэҥэтэн иһэригэр бииргэ үлэлиэҕиҥ!
