Саха АССР культуратын үтүөлээх үлэһитэ, ССРС суруйааччыларын союһун чилиэнэ, талааннаах норуот ырыаһыта, биллиилээх олоҥхоһут Прокопий Прокопьевич Ядрихинскай–Бэдьээлэ 1901 сыллаахха Кулун тутар ый 28 күнүгэр, саас уонна кыһын быысаһар ыйдарыгар  Нам улууһун Көбөкөн нэһилиэгэр (билиҥҥитэ Фрунзе нэһилиэгэр), дьон ахтыытынан мыраан үрдүгэр Үөһээ Малдьаҕар диэн сиргэ, онтон бэйэтэ илиитинэн суруйан хаалларбыт ахтыытыгар "Ынах ойоҕоһо" диэн Кытыл арыыга Ночоруна аҕа ууһугар  дьадаҥы дьиэ кэргэҥҥэ, аҕатын иккис кэргэниттэн сэттис оҕонон төрөөбүтэ.

WhatsApp Image 2021 04 16 at 15.56.40 2

Төрөппүттэрэ дьадаҥы буолан, баайга хамначчыттаан, айах ииттэн олорбуттара. Аҕата Ньоҕор Борокуоппай Сыматтык Хабырыыс диэн баай күүлэйигэр тэҥнээҕин булбатаҕа диэн кэпсииллэр эбит. Төһө да кыһалҕалаахтык олордоллор, дьоно иллэҥсийэ түстүлэр эрэ кэпсээн-ипсээн, ырыа-тойук тэнийбитинэн барар ыала дииллэр. Аҕата Борокуоппай көрүдьүөс кэпсээннэри, ырыаны-тойугу балачча билэрэ. Кини соччо сааһырбакка сылдьан өлбүтүн кэннэ, Улдьукаан диэн сиргэ түһэн олордохторуна, аҕыйах сүөһүлэрэ сотуун ыарыыга олоччу эстибит. Манан туһанан, борбуйун саҥа кыанан эрэр, олорор оҕо эрдэҕинэ Борокуоппайы ийэтинэн ыраах тастыҥ аймаҕа намыһах уҥуохтаах, чоноччу туттан хаамар хара бараан сирэйдээх  Батаакап Бүөтүр (хос аата Хараарбах) диэн киһи сотуун ыарыыннан сылтаан, абааһырҕаатаҕа аатыран, түннүгүнэн таһааран, иитэ ылар.

Иккис балта Маайа Пестеревтарга кийиит буолан уоллаах, кыыс оҕо хаалбыт, оҕолордоохтор, сиэннээхтэр. Төрдүс оҕо дьоҥҥо иитиллэн Дьяконов (Ядрихинскай) Кирсан Иннокентьевич, элбэх оҕолордоох, сиэннэрдээх.

Батаакап Бүөтүргэ дьиэ ис-тас үлэтигэр көмөлөһөн улааппыта. Хараарбах Бүөтүр уус-тылы, сэһэни-сэппэни сэргиирэ, бэйэтэ ырыа-тойук ыаһахтаах киһи эбитэ үһү. Бэл кинилиин «абааһы ылласпыт» дэһэллэрэ, онон ыаллыы ырыаһыттарын, чугас олоҥхоһуттары, анаан хоннорон истэрин сөбүлүүрэ.

Татьяна Васильевна Ядрихинская (Бэдьээлэ сиэнэ) “Е.Г.Охлопков–Буоратай" аатынан норуот айымньытын киинин директора

WhatsApp Image 2021 04 16 at 15.56.40 1

WhatsApp Image 2021 04 16 at 15.56.40 3

WhatsApp Image 2021 04 16 at 15.56.40 4

WhatsApp Image 2021 04 16 at 15.56.40 5