Өксөкүлээх Өлөксөй аатынан Дьохсоҕон орто оскуолата 2021 сылга үктэнэн баран, номнуо кыайыы кынаттанар. Үөрэх чиэппэрэ үрдүк ситиһииттэн саҕаланна.

Үгэскэ кубулуйбут эдэр чинчийээччилэр «Инникигэ хардыы» 25-с үбүлүөйдээх научнай-практическай конференция өрөспүүбүлүкэтээҕи этабыгар Попов Айтал 9 кылаас (салайааччы Лебедева Н.М.), Комиссаров Артур 7 кылаас (салайааччы Попова Н.Д.) дипломант буолан, Россияҕа «Большие вызовы» улахан күрэскэ кыттар чиэскэ тигистилэр.

Салгыы бу оҕолор «WorldSkills» регионнааҕы чемпионакка «Сити фермерство» компетенцияҕа 3 миэстэ буоллулар. «Тыл – омук тыына» сахалыы ыстатыйалары уонна уус-уран кэпсээннэри суруйууга өрөспүүбүлүкэтээҕи күрэскэ Попов Айтал 9 кылаас (салайааччы Сивцева М.В.) «Сэмэй Сэмэн сүбэтэ» өс хоһоонунан суруйбут кэпсээнэ 1 истиэпэннээх лауреат үрдүк аатын ылла. «Саха сирин эдэр олохтоохторо» РРЦ «Гидропониканы үүннэрии» агрохайысханан Дьохсоҕон оскуолата тирэх кыһанан буолла. Таатта улууһуттан уонна Чычымах оскуолата киирдэ.

Дьохсоҕон орто оскуолата «Мин төрөөбүт тылым – мин киэн туттуум» төрөөбүт тыл, сурук-бичик күнүгэр анаан регионнааҕы онлайн-күрэс тэрийэн ыытта. Амма, Чурапчы, Мэҥэ Хаҥалас, Таатта улууһуттан барыта 100-кэ оҕо кытынна. Дьохсоҕон оскуолатыттан Саввина Эльза, Иванова Снежанна 3 бочуоттаах миэстэни ылан үөртүлэр. Снежанна өссө «Мин ийэ тылым» саха тылыгар өрөспүүбүлүкэтээҕи олимпиадаҕа 2 миэстэҕэ тиксэн кыайыы өрөгөйүн биллэ. «Алампа үйэлээх таптала» диэн улуу биир дойдулаахпыт сүрэҕи өрүкүтэр хоһооннорун тапталлаахтар күннэригэр сыһыары тутан күрэс ыытылынна. Орто сүһүөхтэргэ «Кылаан чыпчаал» үрдүк аатын 5 кылаас оҕолоро (сал. Сивцева М.В.), улахаттарга 8 кылаас (сал. Яковлева С.Е.) ыллылар.

Оскуола саха тылын, литературатын учууталлара, ветеран учууталлар Архипова Светлана Климентьевна, Давыдова Галина Константиновна, Сивцева Мария Владимировна улуу биир дойдулаахтарын И.Е.Кулаковскай-Оонньуулаах Уйбааны, А.Е.Кулаковскай-Өксөкүлээх Өлөксөйү, А.И.Софронов-Алампаны үйэтитэн, араас хайысханан үгүс үлэни ыыппыттара. Онно олоҕуран, бу соторутааҕыта «Алтыһыыттан-ситиһиигэ» эйгэ чэрчитинэн, «Үйэлэри уҥуордаан» (бырайыак ааптардара Давыдова Г.К., Попова Т.Л.) оскуола 3 сыллаах иитэр-үөрэтэр ситимнээх үлэтин үөрүүлээхтик арыйдылар. Үлэ сүрүн тосхоллоро: кэлэн иһэр Алампа 135, Өксөкүлээх Өлөксөй 145, Саха сиригэр Автономия 100, Дьохсоҕон нэһилиэгэр үөрэхтээһин 125 сыллаах үбүлүөйдэргэ туһуланар. Нэһилиэк баһылыга Захаров П.Е., «Алампа» аатынан норуот айымньытын киин дириэктэрэ Жараева И.С. күндү ыалдьыт буоллулар. Петр Егорович бырайыак төрөөбүт дойдуну таптыырга, бэриниилээх буоларга, үөрэххэ, үлэҕэ, ытык сир өйдөбүлүн иҥэриигэ суолтатын ыйан туран эҕэрдэлээтэ, өйүүрүн, көмөлөһөрүн биллэрдэ. Бу күн В.С. Гагарин аатынан «Кэскил» оҕо тэрилтэтин бэрэссэдээтэлин куоластааһын нөҥүө таллылар. 4 кандидат турбутуттан оскуола бастыҥ үөрэнээччитэ Попова Ангелина баһыйар үгүс куолаһы ылла.

«Ыллаа-туой, уол оҕо» улуустааҕы ырыа куонкурсугар «Чаҕыл» уолаттар ансаамбыллара (сал. Щукин П.И.) төрдүс миэстэҕэ тигистилэр. «Пора Роста» өрөспүүбүлүкэтээҕи «Саха тылын кэрэ дорҕооно» кэтэхтэн күрэһигэр 4 «а» (сал. Охлопкова С.П.), 4 «б» (сал. Захарова Н.Н.) кылаас уолаттара кыргыттара 2 истиэпэннээх дипломант, Айтал Егоров 3 миэстэ буолан үөртүлэр.

977cbca2 5153 4321 86a5 c06fd732ba28

Соторутааҕыта үрдүкү кылаас уолаттара аан дойду таһымнаах телемост нөҥүө «Юные карбышевцы» аан дойдутааҕы байыаннай-патриотическай оҕо хамсааһыныгар кытыннылар. Бу – аҕа көлүөнэ эйэлээх олох, күннээх халлаан иһин олохторун толук уурбут буойуннар суолларын үөрэтии, тыылга үлэлээбит биир дойдулаахтарын кэриэстээһин, үйэтитии чаҕылхай туоһута буолар. Тэрээһиҥҥэ Москва, Саратов, Дьокуускай, штаб начальнига Храмов А.Н., ДОСААФ салайааччыта, Эдьигээн, Амма, Чурапчы улуустара, Тааттаттан Дьохсоҕон оскуолата, Чөркөөх историческай-этнографическай полисыылка музейа (салайааччы Попов Н.Е.), Чурапчы-Таатта военкома Андреев Н.М., «Саллааттар ийэлэрэ» өрөспүүбүлүкэтээҕи общественнай хамсааһын (салайааччы Емельянова М.Е.) о.д.а кытыннылар.

Таатта улууһугар көҥүл тустуу аһаҕас турнирыгар Никонов Айсен, Никифоров Ньургун, Никонов Вася чөмпүйүөн, Аввакумов Тимур, Никонов Коля, Комиссаров Артур 2 миэстэ, Дмитриев Ярик 3 миэстэ буолан, кыайыы көтөллөөх кэллилэр.

Ити курдук, күргүөмнээх үлэ түмүгэр ситиһии сиэттиһэн кэлэ турар.

Мария Сивцева,  Таатта улууһун А.Е.Кулаковскай аатынан Дьохсоҕон орто оскуолатын саха тылын уонна литературатын учуутала.