Мэҥэ-Хаҥалас улууһун, Төхтүрдээҕи оҕо ускуустубатын оскуолатын "Айар Кут" театральнай устуудьуйатын үөрэнээччилэрэ кэлиҥҥи кэмҥэ үгүс куонкуруска кыайан, ситиһии сиэттиһиилээх буоллулар. Ылыан ылаллар диэтэхпинэ, сыыспатым буолуо. Социальнай ситимнэргэ бу устуудьуйа оҕолоро олус дорҕоонноохтук хоһоон ааҕаллара, ис истэриттэн иэйэн туран ааҕар айымньыларын итэҕэтиилээхтик тиэрдэллэрэ, киһини сөхтөрөр.

WhatsApp Image 2022 03 02 at 17.38.56

Дьэ, бу устуудьуйа салайааччытыттан Вензель Екатерина Ивановнаттан аҕыйах ыйытыкпар хоруйдууругар көрдөстүм.

Оҕолоргут хоһоон ааҕар биидьийэлэрин инстаграмтан көрөн, олус сөхтүм ээ. Оҕолору хаһааҥҥыттан маннык дьарыктыыгын? Уолаттар наһаа чаҕылхайдар дии.

-Бэйэм театральнай кылаас уһуйааччытынан үлэлээбитим 18 сыл буолла. Оттон бу оҕолор хоһоонунан утумнаахтык дьарыктаммыттара үһүс сылыгар барда. Бу - театральнай кылаас иһинэн тэриллибит бөлөх.

WhatsApp Image 2022 03 02 at 17.38.56 2

-Устуудьуйаҕа төһө элбэх оҕо дьарыктанарый? Кыргыттар бааллар дуо? Эбэтэр анаан-минээн уолаттары эрэ дьарыктыыгыт дуу?

-Араас саастаах оҕолордоохпут. Кыргыттар эмиэ бааллар. Уопсайа 17 оҕолоохпут.

-Дьарык хайдах быһыылаахтык ааһарый?

-Биһиги анал үөрэтэр предметтэрдээхпит – «Художественное слово», «Актерское мастерство уонна подготовка сценических номеров», «Фольклорнай ансамбыл».

-Бу предметтэргэ барытыгар бэйэҥ үөрэтэҕиҥ дуо?

-Иккиэбит, Маркова Елизавета Васильевна диэн саҥа үөрэҕин бүтэрэн, идэтинэн үлэлээн эрэр эдэр специалист кыыстаахпын. Мин «Художественное слово» үөрэтэбин уонна «Подготовка сценических номеров» диэҥҥэ аҕыйах чаастаахпын.

-Бэйэҥ тускунан кэпсии түс. Театральнай анал үөрэхтээххин дуо? Эбии тугу үлэлиигин?

-Дьокуускайдааҕы култуура уонна ускуустуба колледжын бүтэрбитим. Билигин бу театральнай кылааска уһуйааччы буоларым таһынан, дириэктэри үөрэх чааһыгар солбуйааччы буолабын.

WhatsApp Image 2022 03 02 at 17.38.56 3

-Ити ааҕыылары таһынан испэктээхтэри, театрализованнай туруоруулары эҥин туруораҕыт дуо?

-Испэктээхтэри туруорабыт, дьиҥинэн. Ону бу хамсык кэлэн, мэһэйдээн, бу икки сылга испэктээх туруорбакка сылдьабыт. Ол эрээри, оҕолорбутун дьарыктыырбытын тохтоппотохпут, тэйиччиттэн да буоллар, куруутун дьарыктанар этибит.

-Устуудьуйа оҕолоро туох ситиһиилэрдээхтэрий?

-Биһиги 2017-2018 сылларга өрөспүүбүлүкэбитигэр ыытыллар «Синяя птица» оcкуола оҕолоругар аналлаах театральнай бэстибээлгэ ситиһиилээхтик кыттаммыт, икки сылы быһа өрөспүүбүлүкэбит чиэһин көмүскээн, Бүтүн Арассыыйатааҕы «Акыйаан» лааҕыр «Океанские подмостки» театральнай көрүүлэригэр ситиһиилэммиппит. Маны сэргэ, хоһоону ааҕыы күрэхтэригэр наар инники күөҥҥэ сылдьабыт. Холобура, бу ааспыт ыйга үгүс хоһоон ааҕыытын күрэҕэр кыттан, элбэхтэ Гран-при буоллубут, ол быыһыгар Үүнэр көлүөнэ тыйаатыра ыыппыт ааҕыы күрэҕэр эмиэ муҥутуур кыайыыны ситиспиппит. Мин санаабар, бу – үтүө үлэбит түмүгэ. Ол да иһин быһыылаах, бастакы миэстэлэргэ тиксибэтэх буоллахпытына, тугу эрэ ситэ үлэлээбэтэх, гымматах курдук сананар буолбуппун. Онон, хас биирдии кыттыы үтүө түмүктэри аҕаларын туһугар дьаныардаахтык үлэлиибит. Хас биирдии оҕоҕо репертуарын таларбар, хайдах айымньы барсыан сөбүн сыта-тура толкуйдуубун. Оттон композицияны туруорарга, «ээ, чэ, маннык бардын, ити даҕаны хоһоону аахтыҥ» диэн эппэппин. Композиция буолан баран, тугу эрэ этиэхтээх дии санаан, репертуарбытын талабыт.

WhatsApp Image 2022 03 02 at 17.38.56 4

-Инникитин туох былааннааххытый?

-Инники былааммыт элбэх. Оҕолору бары өттүнэн сайыннарыыга үлэ барыахтаах. Билиҥҥи оҕо бэйэтин санаатын этинэ үөрэниэхтээх диэн толкуйдуубун. Онон, нэһилиэнньэбит иһигэр араадьыйа эйгэтэ сайыннын диэн ретрансляция туруораммыт, радиоузел нөҥүө оҕолору саҥардар соруктаахпыт. Оҕолор оччоҕуна бэйэлэрэ передача курдук оҥорон, тиэмэлэри буланнар, хас нэдиэлэ аайы биэрии ыытыахтаахтар уонна бэйэлэрэ ол-бу информацияны сырдатан кэпсиэхтээхтэр. Билигин субу маны биһиги кыра-кыралаан үөрэтэбит. Оттон кэнники толору киллэриэ этибит диэн былааннанабыт. Уонна, Саха АССР төрүттэммитэ 100 сылыгар анаан «Үйэни уҥуордаан» диэн бырайыак суруйаммыт, ону үлэлэтэ сылдьабыт. Ол чэрчитинэн, ол-бу викториналары, ити араадьыйабыт нөҥүө сырдатар биэриилэри, улахан дьоннору кытта ток-шоулары ыытыахтаахпыт. Аныгыс ыйга Саха АССР 100 сылыгар аналлаах хоһоон куонкуруһун былааннаан олоробут. Былааннарбыт, ити курдук, киэҥнэр. Саҥа туруоруулары толкуйдуубут, өссө үчүгэйдик чочуллан, үрдүк таһымҥа тахсар баҕа санаалаахпыт.

-Аҕыйах боппуруоспар хоруйдаабытын иһин барҕа махтал. Устуудьуйаҕыт өссө даҕаны ситиһиилэри аҕала турдун.

WhatsApp Image 2022 03 02 at 17.38.56 1

Кэпсэттэ Ираида Коркина

"Айар Кут" оҕо театральнай устуудьуйатын оҕолоро хоһоону ааҕыыларын «Бэлэм буол+» оҕо онлайн үөрэҕин түһүлгэтин @belembuol инстаграмын сирэйиттэн булан көрүҥ -   https://www.instagram.com/tv/CamCMitjvzJ/?utm_medium=copy_link