«Бэлэм буол+» оҕо онлайн үөрэҕин түһүлгэтэ www.belembuol.ru “Төрөөбүт тылбын билэбин” төрөөбүт тыл, сурук-бичик декадатын чэрчитинэн, оҕолорго тута толоруллар викторинаны ыыппыта.

 Тургутук икки кэрдиистэн, барыта холбоон 12 боппуруостан турар этэ. Кыттааччылар бастакы кэрдиискэ тыл сөптөөх быһаарыытын булбуттара, иккис кэрдиискэ өс хоһооннор, уус-уран тэҥнэбиллэр, кубулуйбат эпитеттэр уонна сомоҕо домохтор сөптөөх салҕыыларын ыйбыттара. Бүтэһик ыйытыкка олоҥхоттон быһа тардыыны ааҕан баран, суруллубут кэрчиктэр сөптөөх суолталарын булбуттара.

Викторинаҕа барыта холбоон Сахабыт сирин араас муннугуттан 225 6-7 кылаас үөрэнээччилэрэ кытыннылар. Түмүккэ, ким элбэх баалы ылбытын уонна төһө түргэнник толорбутун учуоттаан, кыайыылаахтары быһаардыбыт.

Тургутук тута (онлайн) толоруллар буолан, ким хас баалы ылбытын уонна төһө түргэн бириэмэнэн толорон бүтэрбитэ ырылыччы көстөр буолан, дьүүллүүр сүбэ үлэлээбэтэ. Быһата, барытын онлайн-калькуляция быһаарда.

 

«Төрөөбүт тылбын билэбин» тургутук кыайыылаахтара

  • ДОБУН СУРУК, I үрдэл - Айтал Софронов, Дьокуускай куорат 12-с нүөмэрдээх оскуолатын 6-с кылааһын үөрэнээччитэ (бириэмэтэ - 00:57, баала - 12);
  • ДОБУН СУРУК, II үрдэл - Геннадий Тобонов, Ньурба оройуонун К.Д. Уткина аатынан Марха Орто оскуолатын үөрэнээччитэ (бириэмэтэ - 01:22, баала - 12);
  • ДОБУН СУРУК, II үрдэл – Виктор Малышев, Өрөспүүбүлүкэтээҕи лиссиэй-интэринээт 8 кылааһын үөрэнээччитэ (бириэмэтэ - 01:22, баала – 12);
  • ДОБУН СУРУК, III үрдэл – Мария Бочкарева, Д.Д.Оллонов аатынан Түүлээх орто оскуолатын 7 кылааһын үөрэнээччитэ (бириэмэтэ - 01:56, баала – 12).

Кыайыылаахтары эҕэрдэлиибит уонна инникитин ситиһиилэри баҕарбыт!

Добун суруктары ыйыллыбыт почталарга, нүөмэрдэргэ (электронно) ыытыахпыт.

Туоһу суруктары ылыан баҕалаахтар сайабылыанньа суруйан, электроннай барыйаанын ыыттарыаххытын сөп (оҕолор чопчу ааттарын-суолларын, ханна үөрэнэллэрин ыйан ыытаргыт булгуччулаах).

Б.н.: 8 (914)102-78-56

 Кыайыылаах оҕолор сэмэй бириистэрин олунньу 24 күнүттэн бу аадырыстан кэлэн ылыахтарын сөп: Киров уулуссатын 18-с дьиэтэ, В блок, 7 этээс.