Л.Н. Харитонов аатынан Маҕарас орто оскуолатыгар быйылгы үөрэх дьылыттан, 2022 с. Саха Өрөспүүбүлүкэтигэр ааҕыы сылын биллэрбитин чэрчитинэн, «Ааҕар түһүлгэ» бырайыак үлэлиир.

 «Ааҕар түһүлгэни» саха тылын учуутала Корякина В.Н., ону тэҥэ оскуола педагог-бибилэтиэкэрэ Степанова М.Р. иилээн-саҕалаан ыыталлар. Бырайыак сүрүн сыалынан-соругунан үөрэнээччилэр саха норуодунай поэта Семен Данилов төрөөбүтэ 105 сааһын көрсө, кини хоһооннорун ааҕыылара, поэзия абылаҥар ылларан, ааҕар дьоҕурдарын сайыннарыылара, кэрэҕэ, үрдүккэ сыстыылара буолар.

Бырайыакка сааһыттан тутулуга суох 1-11 кыл. оҕолоро бука бары ааҕаллар. Иккилии нэдиэлэ буола-буола тиэмэлэринэн наарданан, кылаастарга бэриллэр үөрэнээччилэр бэйэлэрэ эбэтэр төрөппүттэрэ кыттыылаах  видеону дорҕоонноохтук (көрөн туран, нойосуус үөрэтэн) ааҕан, устан ыыталлар. Видеолар барыта оскуола официальнай инстаграмын сирэйигэр тахсаллар. Бу бырайыакка үөрэнээччилэр сахалыы саҥарар дьоҕурдара сайдар, поэт хоһооннорун кытта билсэллэр, өйгө тутар (нойосуус этии) сатабылларын өссө эбии чиҥэтэллэр. Маны тэҥэ, «Өркөн» көрдөрөр-иһитиннэрэр пресс-киини үлэлэтэллэр, онно оскуола сонуннарын, тэрээһиннэрин кэрэспэдьиэн, диктор оҕолор сырдаталлар.