А.В. Чугунов аатынан Мэлдьэхси орто оскуолатыттан  "Тэлээрис" үҥкүү ансаамбыла Москва куоракка буолбут "Ороһооспотооҕу сулустар" норуоттар икки ардыларынааҕы күрэххэ кытыннылар. «Норуот үҥкүүтэ» номинацияҕа  1 ист. лауреат аатын сүктүлэр. Сахалыы таҥастаах, дэйбиир, чороон тутуурдаах уопсайа 19 буолан үҥкүүлээтилэр. Бу туһунан «Тэлээрис» үҥкүү бөлөҕүн салайааччыта Мария Дмитриевна Куприянова кэпсиир

- Быйылгы үөрэх дьылыгар сэтинньи ыйга XXII төгүлүн Москубаҕа ыыттыллар норуоттар икки ардыларынааҕы «Ороһооспотооҕу сулустар» бэстибээл-куонкурустан ыҥырыы сурук  туппуппут. Тута төрөппүттэрбин, оҕолорбун кытта сүбэлэһэн баран, кыттарга санаммыппыт. Ол курдук төрөппүттэрим, үлэлиир оскуолам салалтатын өйөбүлүнэн тохсунньу 6 күнүгэр кыттан, 1 ист. лауреат буоллубут. Оҕолорум үчүгэйдик кыттаннар «Педагогическая ника» бириэмийэ хаһаайына буоллум. Куонкуруска араас сирдэртэн кэлбит оҕолор үҥкүүлэрин көрөн олус астынныбыт. Саҥа дьыллааҕы Москуба устун күүлэйдээн дуоһуйа сынньанныбыт. Тэҥҥэ сылдьыспыт, көмө буолбут төрөппүттэрбэр Семен,  Анна Герасимовтарга, выпускниктарбар Кристина Герасимоваҕа, Карина Куприяноваҕа махталым муҥура суох.

WhatsApp Image 2022 01 14 at 12.12.17

Оҕолор дойдубут тэбэр сүрэҕэ Москуба бэлиэ сирдэрин, ол курдук ВДНХ, Космонавтика түмэлэ, «Океанрум» уонна, биллэн турар, араас уотунан-күөһүнэн Саҥа дьыллыы киэркэйбит Кыһыл болуоссат уо.д.а. устун үөрэ-көтө күүлэйдээн олус астыммыттар. Бу туһунан оҕолор санааларын үллэстэллэр.

Женя Колесов, 11 кылаас үөрэнээччитэ:

- Москуба куоракка барабыт диэн аан бастаан эппиттэригэр барыахпыт диэн тоҕо эрэ итэҕэйбэтэҕим. Ол эрээри түргэн баҕайытык үҥкүүнү бэлэмнэнэн барбыппыт. Арай өйдөммүппүт  көтөн тиийэн лауреат буолбут эбиппит. Москуба олус улахан уонна кэрэ көстүүлээх куорат эбит дии санаатым. Биэс эрэ күн иһигэр да буоллар наһаа үчүгэйдик сылдьан кэллибит.

WhatsApp Image 2022 01 14 at 12.12.18 1

Уйгу Егорова, 8 кылаас үөрэнээччитэ:

- Москубаҕа бастакыбын сылдьыбытым. Уоттаах-күөстээх¸ олус кэрэ  көстүүлээх улахан куорат. Элбэх пааматынньыктары, түмэллэри  көрбүппүт. Кыһыл болуоссаты саамай сөбүлүү көрбүтүм. Архитектурата киһи хараҕар хатанар. Бэйэтигэр угуйар күүстээх куорат дии санаатым. Хаһыстаан да барыам этэ.

WhatsApp Image 2022 01 14 at 12.12.20

Мария Дмитриевнаны уонна оҕолору улахан ситиһиилэрин истиҥник эҕэрдэлиибит. Өссө да итинник таһымнаах ситиһиилэр кэлэ турдуннар.

WhatsApp Image 2022 01 14 at 12.12.21

WhatsApp Image 2022 01 14 at 12.12.22

WhatsApp Image 2022 01 14 at 12.12.23

Милена Неустроева, 7 кылаас

«Үктэл» юнкорпост