Сунтаар улууһун култууратын эдэр үлэһиттэрин “Сайдыс” түмсүүтэ (бэрэссэдээтэл Евдокия Сивцева) Тойбохой оҕо дьиэтин кытта ыкса ситимнээхтик үлэлиир. Урукку сылларга оҕолору фотосессиялаан, араас маастар-кылаастары, оонньуулары тэрийэн, киинэҕэ, кафеҕа сырытыннаран турардаахтар.
Бу сайын “Алмазэргиэнбанк” тэрилтэ социальнай хайысхалаах граннарын күрэстэригэр кыттан 50 тыһ. үбүлэнэн “Блогердар оскуолалара” диэн тэрээһини тэрийэн ыыттылар. Оскуоланы тэрийиигэ Сунтаар улууһун култууратын уонна айылгытын салалтата (салайааччы Мария Кобельянова-Тускулаана) сүрүн көмөнү оҥордулар. Дойду үрдүнэн хоруоналаах ыарыы турбутунан үөрэх кэтэхтэн, зум-платформанан ааста. Үөрэххэ маннык формат эмиэ үтүө өрүттээҕэ билиннэ.
Ол курдук, маннык быһыылаахтык ыытыллар тэрээһиҥҥэ элбэх дьон хабылынна. Үөрэххэ хаартысканы сатаан оҥорорго, саҥа сыһыарыылары тутта үөрэнэргэ, хаачыстыбаннай видео устарга үөрэттилэр. Ордук оҕолор ыҥырыылаах блогердар кэпсээннэрин сэргээтилэр. Кинилэр хайдах саҕалаабыттарын, ордук тугу сөбүлээн сырдаталларын, хамнастарыгар тиийэ ыйыталастылар. Тэрээһин түмүктэниитэ оҕолорго соһуччу бэлэҕинэн пицца, гамбургер, фри хортуоскатын ыыппыттарын туттулар. Онуоха, оҕолор тутатына тэттик видео устан ыыттылар.
Мира Афанасьева култуура үлэһитэ, бырайыак ааптара: “Аныгы олох сиэринэн оҕолор куйаар ситиминэн арааһы билэр, үөрэнэр кэмнэригэр “Блогердар оскуолалара” оҕолор болҕомтолорун тарта. Тэрээһиммитин Зуум платформаҕа ыыттыбыт. Төһө да оҕолор дистанционнай форматтан сылайдаллар, үөрэххэ көхтөөхтүк кытыннылар. Ыйытар боппуруостара, эчи, сэргэҕин, биэрбит сорудахпытын тутатына толорбуттара “Блогердар оскуолаларын” толору баһылаабыттара көһүннэ”.
Анна Уарова Тойбохой, оҕо дьиэтин тэрийээччи педагога: “Култуура эйгэтин эдэр үлэһиттэрин “Сайдыс” түмсүүтүн кытта хаһыс да сылбытын тэҥҥэ алтыһабыт. Мэлдьи оҕолорго үөрүүлээх-көтүүлээх тэрээһиннэри бэлэмнииллэр. Бу сырыыга ”Блогердар оскуолаларыгар” оҕолор бэрт сэргээн үөрэннилэр. Дьиэҕэ хаайтаран олорор оҕолорго тэрээһин бырааһынньык курдук ааста. Өссө да бииргэ үлэлэһэ туруохпут диэн санаалаахпыт”.
Бу ыарыы аччаатаҕына оҕолор аудио, видео студияҕа ыалдьыттыы киирэллэрин күүтэ хааллылар. Оттон “Сайдыстар” оҕолорго саҥа тэрээһини тэрийэр толкуйугар түстүлэр.
Мира Афанасьева
