Балаҕан ыйын 1 күнүгэр мааны таҥастаах-саптаах,  чөкө көстүүмнээх оҕолор, маҥан баанчыктаах кырачаан кыргыттар, хаалтыстаах моторуспут оччугуй уолаттар сибэкки дьөрбөтүн туппутунан Билии бырааһынньыгар кэллилэр. Ордук долгутуулаах түгэн маҥнайгы кылааска киирбит кырачааннарга тосхойдо – кинилэргэ маҥнайгы чуораан чугдаарда.

«Оҕо сааспыт биһигэ,

Үөрэхпит кыһата – Айыы Кыһата

Били киэҥ аартыгар сирдиир

Суолдьут сулус эн буолаҕыҥ”,-

диэн тылларынан «Айыы Кыһата» Саха национальный гимназиятыгар Билии бырааһынньыга саҕаланна. Бу ураты күҥҥэ эрэ анаммыттыы күн эбии чаҕылыйбыкка, халлаан үрдээбиккэ, көҕөрбүккэ-наҕарбыкка дылы буолла. Үөрбүт-көппүт, сайын устата сынньаммыт көрүҥнээх, харахтара дьол уотунан кыыспыт оҕо-аймах тоҕуоруһа муһунна.

WhatsApp Image 2021 09 01 at 15.44.14

2020-2021 сыллаах үөрэх сылыгар «Айыы кыһата» төрүттэммитэ 15 сылын туолбут эбит. Онон, саҥа үөрэх дьылын үөрүүлээх чааһыгар анаммыт Билии уота умайда, хомус алыптаах тыаһа дьиэрэйдэ, тойук туойулунна, эҕэрдэ тыл эгэлгэтэ этилиннэ, алгыс түстэннэ.

Аан дойдуга тарҕаммыт хамсыгынан сибээстээн Айыы Кыһатын билии бырааһынньыгар үөрэнээччилэри чааһынан араартаан мустулар. Ол эбэтэр, сарсыарда тоҕус аҥаар, уон аҥаар уонна уон биир аҥаар чаастарга  биирдии 4-с, 5-с, 9-с, 11-с уонна аҕыйахтыы маҥнайгы кылаастары аҥаарталаан ыҥырбыттар. Төһө даҕаны хааччах хас биирдиибитин хаарыйдар, дьон бары онно эрэ кыһаммакка үөрэх-билии дьоро чааһын, Билии күнүн көрсө үөрбүт-көппүт, санаалара көнньүөрбүт көрүҥнээх.

Билии күнүн түһүлгэтин биллиилээх тойуксут уонна хомусчут Сахаайа Нохсорова алыптаахтык хомуска оонньоон, кылыһахтаах куолаһынан тойук туойан арыйда.

WhatsApp Image 2021 09 01 at 15.46.30

WhatsApp Image 2021 09 01 at 15.47.02

Ити кэннэ Айыы кыһата оскуола сэһэнньитэ Анатолий Николаевич Павлов-Дабыл үөрэх билии уотун уматта, алҕаата уонна сиэр быһыытынан Билии уотун Айыы Кыһатын дириэктэригэр үөрүүлээхтик туттарда. Салҕыы, буоларын курдук Арассыыйа уонна Саха Өрөспүүбүлүкэтин гиимнэрэ тыаһаатылар.

WhatsApp Image 2021 09 01 at 15.47.22

Онтон бэйэлэрин эҕэрдэ тылларын Айыы Кыһатын дириэктэрэ Лидия Петровна Шамаева уонна ыҥырыылаах ыалдьыт, «Дьокуускай куорат” уокурук баһылыгын солбуйааччыта Георгий Игоревич Гаврильев эҕэрдэ тылларын эттилэр.

WhatsApp Image 2021 09 01 at 15.47.53

Бу кэнниттэн «Сандал» норуодунай үҥкүү ансаамбыла «Үс кут хамсаныыта» үҥкүүнү толорон бырааһынньыгы сэргэхситтэ (сал. СӨ үөрэҕин туйгуна С.А.Катакова, уһуйааччы С.Х.Яковлева).

WhatsApp Image 2021 09 01 at 15.48.49

Айыы Кыһатыгар Билии бырааһынньыгын түмүгэр маҥнайгы кылаас үөрэнээччилэригэр бэлэх чуорааннаар түҥэтиллибиттэрин кэнниттэн кырачааннар чуорааннаах сэлэлээн хаамтылар. Бу күн долгутуулаах чааһыттан киһи эрэ үөрэр, сүргэтэ көтөҕүллэр эбит.

WhatsApp Image 2021 09 01 at 15.43.56 1

 

Саҥа үөрэх дьылыгар бары үөрэнээччилэргэ ситиһиилэри баҕарыаҕыҥ!

Ираида Коркина-Чугдаара