"Самаан сайыны хоһуйабын" сайын туһунан хоһоону суруйууга оскуола оҕолоругар аһаҕас Өрөспүүбүлүкэтээҕи күрэспитигэр аҕыйах оҕо кыттыыны ылла.

Кэнники киирбит кыттааччылары уонна кинилэр хоһооннорун ааҕаачыларга билиһиннэрэбит.

Конкурсант Давыдова

 Давыдова Сардаана, МБҮӨТ «Академик Л. В. Киренскэй аатынан Амматааҕы лиссиэй» 7 «б” кылааһын үөрэнээччитэ, 12 саастаах.

 Сайын
Алтан аалыы күммүт
Наҕылыйа сырылаччы тыган,
Хаарыан хампа күөҕүнэн
Ийэ айылҕа барахсаны
Симээбитэ кэрэтиэн!
Налыы талба хонууну
Байым араас өҥүнэн
Оҕуруолуу тиспитэ,
Сирин аһын өлгөмүнэн
Минньитэ амсаппыта,
Дьэҥкир ууга ыһыахтана
Умсаахтата оонньоппута кэрэтиэн!
Буһурук куйааспыт
Күбэй ийэлии имэрийэн-томоруйан,
Чаҕыл күммүт сылама
Көөчүүктэнэ бигээн
Кылгастык да буоллар
Миигин, эйигин, кинини
Үөрдүбүтэ кэрэтиэн!

Төрөппүт көмөлөспүт тылларын быһаарыылара:
Аалыы -  күн кыырпахтара ыстаналлар,
Сырылаччы - олус күүскэ,
Байым - баай, араас элбэх,
Буһурук - итии, куйаас.

Конкурсант КИРИЛЛИНА

Кириллина Айта, 9 саастаах, Сунтаар улууһун П.Х. Староватов аатынан Элгээйи Орто оскуолатын 4 кылааһын үөрэнээччитэ.

Кэрэ сайын

Күммүт үөһэ күөрэйдэ,

Күөрэгэй чыычаах дьырылаата,

Куйаас сайын кэлбитин

Киһи-аймах барыта

Күлэ-үөрэ көрүстэ.

Күлүмүрдэс күн уота

Күндээриччи күлүмнээтэ,

Кэтэһиилээх сайыммыт

Күндү бэлэх оҥорон

Көрү-нары үксэттэ.

Күөх оппут чэлгийэн,

Кэрэ бэйэлээх сибэккилэр

Кынталдьыһан нарыннык

Күн сирин киэргэтэн

Көҕүөр симэҕин ойуулаан,

Кыраһыабай бэйэлээх,

Кустук өҥүнүү тэлгэнэн

Куйаас сайыны уруйдаан

Киэргэттилэр алаастары.

Күөх халлааҥҥа чыычаахтар   ...

Кынаттарынан сапсынан

Күн ийэ сирбитин -

Кырдаллары, сыһыылары

Кэрийэ көтөн үҥкүүлээтилэр,

Кэрэ куоластарынан ыллаатылар.

Кылбаа маҥан, кытархай,

Кугас, араҕас өҥнөрдөөх

Кыраһыабай да үрүмэччилэр

Киэҥ сиринэн тэлээрэннэр,

Көрүөхтэн кэрэ көстүүлээх

Киэргэттилэр, симээтилэр.

Күөх сайын!

Кэрэ сайын!

Кылгас да күннэргэ

Күн уотунан мичээрдээн

Күндү бэлэх уунаҕын!

  

Төрөппүт көмөлөспүт тыллара:

o       Кынталдьыһан-х.-р.: кыталыктыы кынталдьыһан

o       Кырдаллары.(кырдал)

o       Көҕүөр

o       Уруйдаан.

IMG 3311

Люда Санникова, Ленскэй оройуонун Нуотара орто оскуолатын 3 кылааһын үөрэнээччитэ

Мин сайын

 

Мин сайын Ыһыахха сылдьыбытым

Аймах дьоммун көрсөммүт

Үөрүү бөҕө буолбутум.

Мин сайын оҕуруот арааһын

Тиэргэммэр олордубутум

Устар сайыны быһа

Оҕо курдук бүөбэйдээтим.

Мин сайын дуоһуйа сөтүөлээтим

Доҕотторбун кытта оонньоон,

Мэниктээн да биэрдим.

Мин сайын дьэдьэннээн

Эдьиийбин сөхтөрдүм

Дьэдьэн барыанньатынан

Эбээбин күндүлээтим.

Мин сайын оттооммун

Дьоммун наһаа да үөртүм

Оттообут оппун сиэн

Ньирэйдэрим барахсаттар

Кыһын өссө улаатыахтара

Мин эһиил өссө улаатыам

Элбэх да оту оттуом.

Сайын барахсан кылгаһын

Бүтүмэ дуу сайын... бүтүмэ.

 

Төрөппүт көмөлөспүт тыллара:

Бүөбэйдээн – көрөн, харайан.

Күндүлээтим – күндү киһибэр бэристим, амсаттым.