Уол оҕо хаан-уруу аймахтарын иннигэр эппиэтинэстээх уонна кинилэринэн киэн тутта улаатарыгар усулуобуйа тэрийэр сыаллаах В.В.Алексеев аатынан  Мүрүтээҕи уолаттар гимназияларыгар, 5 кылааска саҥа кэлбит уолаанчыктарга “Удьуор утума” тэрээһин үрдүк таһымҥа ыыттылынна.  Бу бырайыак хас биирдии кылаас айымньылаах сыһыанынан тэрээһин ис хоһооно, тутула сыл ахсын сайдан, байан иһэрэ кэрэхсэбиллээх.   Тэрээһин уолаттар, төрөппүттэр, учууталлар бэйэ-бэйэлэрин билсиһиилэригэр уонна уол оҕо дьиэ кэргэнин, аймахтарын иннилэригэр эппиэтинэстээх буола улаатарыгар туһуланар. 

“Удьуор утума” бырайыак быйыл 14 төгүлүн ыытыллар.  5-с кылаас үөрэнээччилэрин, төрөппүттэрин уонна кураторын бастакы тэрээһиннэрэ буолар. Онон ордук долгутуулаах уонна эппиэтинэстээх. Балаҕан ыйыгар дьиэ кэргэҥҥэ төрүччүнү, удьуор утумун үөрэтэргэ, оҥорорго сорудах бэриллэр. Кылаас коллектива биир сахалыы таҥас тиктэрэрэ үгэс буолла.

Тэрээһин бастакы түһүмэҕэр алгыс, кылаас бэйэни билиһиннэриитэ, дьүһүйүүтэ буолар. Алгыһы эттэ Галина Никитична Иванова. Кини уолаттары үйэлэрин тухары бииргэ тутуһа сылдьалларыгар бииргэ күрүөлээтэ уонна алгыс тылынан алҕаата.

Сахалыы таҥастаан уолаттар дьоһуннук туттан төрүччүлэрин, киэн туттар аймахтарын билиһиннэрдилэр.  Уолаттар дьиэ кэргэннэрин кытта 17 үйэҕэ тиийэ төрүччүлэрин үөрэтэннэр олус сөхтөрдүлэр.

Күпсүүр, хомус тыаһынан дуораһыттылар, күргүөмүнэн ыллаан ньиргиттилэр. Өбүгэ оонньуутугар күүстэрин холоннулар, төрөөбүт ыйдарынан өйдөбүнньүк харысхал бэлиэтин туттулар.

Кыра дьон эрээрии, тэрээһини барытын бэйэлэрэ иилээн-саҕалаан салайан ыыттылар – Бурнашев Сайаан уонна Никулин Юрий.

Бу курдук, 5 кылаас уолаанчыктара гимназияҕа бастакы сүрэхтэниини чиэстээхтик, эппиэтинэстээхтик аастылар. Инникитин да бу курдук биир сомоҕо буолан өссө үрдүк чыпчааллары, дабайыылары баҕарабыт! Үөрэхтээх, дьоһун дьон буола улааттыннар!

5a9f8faa a08f 4d8c b876 e5d772bb6fa5a31f2562 5de5 4ce4 a99a 7ee01f6ef64a