Остуоруйа кудуга

Төрөөбүт дойду,                                                                                                                           

 Төрүт сир                                                                                                                            

Төһөҕө даҕаны                                                                                                                           

 Төлкө үөскүүрүгэр                                                                                                                             

Төрүт буолар.

 Алампа.

      IMG 20210412 WA0028 1                

   Торуойбутугар Ытык мастарбыт күүтэллэр.

(дьүһүйүү)

        Мин эбэм дойдута Торуой Хомустаах олус кэрэ айылҕалаах. Сайын үрдүк күөх мыраанын аннынан сүүрэр ыраас чүөмпэ уутугар сөтүөлүүбүт, кырылас кумаҕар күөлэһийэ сыламныыбыт, ыраас мүөттээх салгынынан дуоһуйа тыынабыт, чээлэй күөх хонуутугар оонньуубут-көрүлүүбүт.

       Саамай сөбүлээн сөтүөлүүр сирбит – Yрүҥ Эбэ. Бу Ытык сиргэ мин эбэм маанылаах Yс хатыҥ маһа турар. Тиийдэхпитинэ, баараҕай хатыҥ маспыт күөх лабааларынан суугунаан, эҕэрдэлии көрсөр. Мин эбэбинээн кууһан, имэрийэн, ахтылҕаммытын таһаарабыт уонна алгыстаах алаадьынан айах тутан аһатабыт. Ол кэннэ айылҕа анаан туруорбут «олох маһыгар» олорон сөрүүкүүбүт уонна Yрүн Эбэбитигэр сөтүөлүү киирэбит. Дьиэбитигэр төннөрбүтүгэр эмиэ сынньанан ааһабыт. Урут эбэм -  ийэбин, билигин миигин батыһыннарар үһү. «Эдэр эрдэхпиттэн кутум-сурум дойдубар эрэ тохтуур», - диир эбэм.

       Иккис сөбүлээн сөтүөлуур сирбит – Тумус. Эбэм маанылаах баараҕай Тиит маһа сыыр үрдүгэр суол кытыытыгар соҕотоҕун улуутуйан тураахтыыр. Эбэм киһини өйдуур буолуоҕуттан баар үһү. Бу Ытык маспытын арыылаах алаадьынан күндүлүүбүт-маанылыыбыт уонна кууһан өр да өр турабыт. Ол аата кэлбиппитин, таптыырбытын биллэрэбит уонна күүс-сэниэ ылабыт.

      Уу кытыытыгар кумахха соҕотох Yөт мас «күүттум даҕаны» диэбиттии үөрэн сэбирдэхтэрэ сэлибирии түһээхтиир. Yөппут барахсаны эмиэ имэрийэбит-томоруйабыт, айах тутан аһатабыт. Эбэм  Yөтун күлүгэр олорон, уҥуоргу биэрэги, мырааны одуулаһар. Мин кумахха оонньуубун, араас дыбарыастары тутабын уонна сүүрэн киирэн сөтүөлүүбүн.

      Торуойбутуттан барарбытыгар кэрэ-бэлиэ мастарбытын «эһиил эмиэ кэлиэхпит, күүтээриҥ диэн алгыстаах алаадьынан аһатабыт уонна куустуһан арахсабыт.

       Онтон Ытык мастарбыт кэрэ хартыына буолан дьиэбитин киэргэтэллэр, дойдубутун санаталлар. Ону көрөн, сүрэхпит үөрэр уонна манньыйар.

      Мин ырыаҕа ылламмыт, хоһооҥҥо хоһуллубут кэрэ айылҕалаах Торуойбун уонна эбэм маанылаах мастарын наһаа күүскэ таптыыбын, олус диэн ахтабын. Тапталлаах Торуойбар эбэм мастара миигин күүтэллэр.

                                                     

Шамаев Алёша,

Нам улууhун Хамаҕатта саха-французскай лиссиэйин 3 кылаас үөрэнээччитэ

IMG 20210412 WA0029

 

IMG 20210412 WA0031