Остуоруйа кудуга

Вера диэн кыыс олорбута үһү. Кини олус хаппырыыс уонна истигэнэ суох эбит. Маны баҕарабын, ону баҕарбаппын...Баҕарбатаҕына уруоктарын көтүтэр, күнү быһа оронугар күөлэһийэр, “лайктары” маныыр уонна камера иннигэр мунньаҥалыыр.Дьэ, ити курдук Вера кыыс хаппырыыстыы сылдьыа эбитэ буолуо эрээри, биир үтүө күн маннык буолбут.

Биир сааскы сарсыарда учууталлара Нелли Сидоровна тулалыыр эйгэ уруогар ойуурга бастакы ньургуһуннар тахсыбыттарын кылааһынан көрө баралларын туһунан эппитэ. Оҕолор, Вераттан ураты, бары олус үөрбүттэрэ. Кини эбиэт кэнниттэн компьютерга оонньуон, тик-ток устуон, “лайк” тутуон баҕарбыта. Ол эрэн, учууталлара олус кытаанах этэ, онон Вера барарга тиийбитэ. Сылаас уонна күннээх этэ. Оҕолор ньургуһуннаах сыһыыга тиийэн кэлбиттэр. Кыыс тута ньургуһуну үргээри оҥостубутугар учуутал хомуйар сатамматын, ньургуһуннар Кыһыл кинигэҕэ киллэриллибиттэрин туһунан эппитэ. Онуоха Вера кыыһырбыта, сибэккилэри атаҕынан тэпсэн баран сүүрэ турбута.

Хаппырыыс Вера атах балай сүүрэн испитэ.Эмискэ иҥнэн охтон түспүтэ. Арай, харахтарын арыйбыта кинини улахан баҕайы фиолетовай харахтардаах кыыс көрөн олорор эбит.Кыыс Вера хайдаҕын, туга ыалдьарын, тугун эрэ өлөрбүтүн-өлөрбөтөҕүн ыйыталаспыт. Вера кыыстан кимин ыйыппыт — дьиктитэ диэн, кыыс бары кыргыттар курдук таҥастаах буолбатах, сайыҥҥылыы чараас былааччыйалаах этэ эбээт. Кинилэр билсибиттэр. Бу сибэкки-кыыс эбит, аата Ньургуһун.Кини бэйэтин эйгэтин, сыллата аҕыйаан иһэр аймахтарын туһунан кэпсээбит. Хас саас аайы кинилэри үргээн уонна тэпсэн бүтэрэн эрэллэр. Дьэ, онно Вера атын эйгэ баарын өйдөөбүт.Кыыллар уонна сибэккилэр эйгэлэрэ. Син дьон курдук тыыннаахтар, барытын билэллэр, айманаллар. Ньургуhун кыыһы олус элбэх ньургуһун үүнэр, чыычаах-аймах ыллыыр, тииҥчээннэр, мурукулар уонна дьабаралар сүүрэкэлиир сыһыыларыгар илдьибитэ. Онно, бэл диэтэр, көрдөөх куобахчааннар дьиэлэрэ баара.

Онтон сибэкки-кыыс Вераҕа дьиэтигэр төннөр суолу көрдөрбүтэ. Вера бу сырыытын сөбүлээбит уонна саҥа дьүөгэлэммититтэн олус үөрбүтэ.

Вера кыыс дьиэтигэр төннөн баран, кылаас иннигэр кинини бырастыы гыналларыгар көрдөспүтэ.Айылҕаны харыстыыр, көмүскүүр, доҕоттору кытта элбэхтик алтыһар, кинилэри кытта айылҕаҕа элбэхтик сылдьар наадатын өйдөөбүтэ.Айылҕаны билэ-көрө сатааһын, айылҕа туругун тургутааһын күнү күннүктээн дьиэҕэ интернеккэ “ыйанан” олорордооҕор быдан интэриэһинэй эбээт.

Күннэйэ Трофимова

4 кылаас

Маар с.,

Ньурба улууһа,

Саха Өрөспүүбүлүкэтэ