Остуоруйа кудуга

Ханнык эрэ саарыстыбаҕа, хайдах эрэ судаарыстыбаҕа ыраахтааҕы олорбут. Кини кыракый уоллаах эбит — Баанньыска. Арай биирдэ Бааньыска ыалдьыбыт, аһаабат-сиэбэт, оронтон турбат буолбут. Ыраахтааҕы саамай бастыҥ луохтурдары ыҥыртаабыт да, туһата суох. Оччотугар ыраахтааҕы чугастааҕы-ыраахтааҕы отоһуттары ыҥыртаабыт. Биир кырдьаҕас отоһут эмээхсин маннык ыарыыны боростуой ромашка сибэкки эмтиир кыахтааҕын хаһан эрэ эбэтиттэн истибитин кэпсээбит. Ол эрэн, көннрү ромашка буолбатах. Хонууга-сыһыыга саһархай харахтаах балыстар-эдьиийдэр элбэхтэр, ол эрэн  дьоннору уонна кыыллары бары эмтиир буолбатахтар. Бу ромашканы атыттартан хайдах араарары ким да билбэт. Оннук эбит буоллаҕына, ыраахтааҕы ыйаах таһаарбыт: эмтээх ромашканы булан аҕалбыт уонна кини уолун эмтээбит киһини балысханнык манньалыырга уонна ыраахтааҕы эмчитинэн аныырга! Оттон атын, туһата суох сибэккини булан аҕалбыт киһини төбөтүн быһарга. Дьоннор куттаммытар, ким да сибэкки көрдүү барбат буолбут. Арай Маша, отоһут эмээхсин сиэнэ эппит:

– Эбээ, мин ойуурга бардым. Баҕар эмтээх ромашканы булан ылаайамый. Ыраахтааҕы уолчаанын олус аһынабын.

Маша ыаҕайатын ылан барбыт. Ыллык устун хааман иһэр, тулатын көрүнэр. Эмискэ күүстээх тыал түспүт, Маша төбөтүттэн былаатын туура охсубут уонна илдьэ турбут. Маша ону батыһа сатаабатах.

– Тыал-кырдьаҕас, мин былааппын сөбүлээтиҥ дуо? Чэ, ыл, мин көҥөммөппүн.

Маша бардар-баран испит уонна улахан сыһыыга тахсан кэлбит. Онно ромашка бөҕө иннэ-кэннэ суох үүнэн турар эбит! Кыра да баар, улахан да баар, үрдүктэр, намыһахтар уонна бары саһархай харахтарынан халлааны көрөн тураллар. Мантан биири, эмтээх ромашканы хайдах булуоххунуй! Эмискэ эмиэ тыал түспүт, сыһыы устун ромашкалар сиргэ сыстыахтарыгар диэри үрэн сирилэппит уонна көтөн хаалбыт. Оттон Маша сыһыыны кэрийэ сылдьан хас биирдии ромашканы туруорар, мах-маҕан төбөлөрүттэн имэрийэр. Маша саамай бытархай ромашкаларга тиийэн баран сөрү диэн сөхтө — сибэкки сыта манна дыргыйан олорор эбит!Кинилэртэн сылааһынан, ойуурунан уонна хонуунан илгийэр. Кыыс сэрэйбит: тыал күнтэн, ойууртан уонна хонууттан кэрэ сыты-сымары хомуйбут уонна манна мунньубут. Маша биллин диэн.

– Махтал буоллун, эйиэхэ, Тыал-кырдьаҕас, – диэбит Маша, курданарыгар диэри тоҥхох гынан бокулуоннаабыт уонна сибэккилэри хомуйан барбыт. Ыаҕайатын толору хомуйбут уонна ыраахтааҕы ыарыһах уолугар тиэтэйбит. Үс күнү быһа ромашка сүмэһинин кыынньаран, уолга хамыйаҕынан иһэрдибит. Үс хонон баран Баанньыска уолчаан үтүөрэн туран кэлбит. Ыраахтааҕы Машаны олус баайдык манньалаабыт. Оттон Маша ол харчыга балыыһа арыйбыт. Онтон ыла эмтээх оттору хомуйар уонна ыарыһах дьону эмтиир.

Александра Белостоцкая,

3 кылаас,

Донецкай к.,

Украина