Остуоруйа кудуга

Ардах кэнниттэн инчэҕэй суоллар хантан үөскүүллэрин билэҕит дуо?

Бука, үгүстэр туох акаары боппуруоһун биэрэрий дии санаабыт буолуохтааххыт. Ол эрэн бу көстүүнү билимтэн атыннык көрдөххө, букатын атын, кистэлэҥ суолталанар.

XVII үйэҕэ, ол эбэтэр киһи тугу барытын кистэлэҥ күүскэ күтүрүүр кэмигэр, аангылыйа Flatford дэриэбинэтин олохтоохторо дьикти көстүү сибидиэтэллэринэн булбуттара. Бу дэриэбинэ кытыытыгар Мэри диэн ааттаах уон алта саастаах кыыс олорбута. Оччотооҕу кэмҥэ киһиттэн ураты көрүҥнээҕэ үһү. Тириитэ фарфор курдук кубаххай этэ, харахтара от күөҕүнэн умайаллара даҕаны, күн уотугар кыһыл көмүһүнэн толбонураллара, оттон кугас куударалаах баттаҕа уот төлөнүн санаталлара.

Мэри тулаайах буолан соҕотоҕун олороро. Кыысчаан олоҕо атыттартан туох да уратыта суоҕа. Ол эрэн, кэнники кэмҥэ кинини биир куһаҕан түүл буулаабыт — ойуурга ханнык эрэ эргэ кудук баарыттан ким эрэ кинини ыҥырар. Мэри түүлүгэр туох кэтэһэрин билэр буолан, өр кэмҥэ утуйуон куттанар буолбут. Бу түүҥҥү баттатыыттан кыыс улаханнык сылайбыт, онон ол ойуурга бара сылдьардыы санаммыт.

Ойуур ыккыйыгар киирээт даҕаны, кыыс били эргэ кудугу көрбүт. Хараҥа от куөҕэ муоҕунан саба үүммүт, тоһоҕолорунан хам сааллыбыт холуодьаһы. Мэри уһуннук толкуйдуу барбакка холуодьаһы арыйбыт уонна болоорхой ууга бэйэтин күлүгүн көрбүт. Эмискэ ол күлүгэ кинини эҕэрдэлээбит, оттон кыыс кудук түгэҕиттэн иһиллибит куолаһы ийэтин куолаһыгар майгынната санаабыт.

Кыыс ойуурга өссө хаста да кэлэ сылдьыбыт, кудугу өҥөйөн били дьикти күлүгүн кытта кэпсэппит. Барыта үчүгэй этэ, Мэри кэмниэ кэнэҕэс соҕотохсуйуу билиэниттэн босхоломмут, онтон санаата көнньүөрбүт, бэйэтэ да билбэтинэн мичээрдии сылдьар буолбут.

Биирдэ кини кистэлэҥ доҕорун кытта кэпсэтэрин лесник истибит уонна кудукка олохтоох сибиэн туһунан дьоҥҥо барытыгар кэпсээбит. Дьоннор кудугу алдьатарга, “ведьма” кыыһы уматарга быһаарбыттар.

Күн саҕах кэннигэр саһаатын кытта Мэри ойуурга кэлбит уонна кудук урусхалламмытын көрбүт. Кыыс хараҕын уута халыйбыт, оттон сүрэҕин соҕотохсуйуу ытарчата хам ылбыт. Кинини уматыахтарын иннинэ кыыс кудук турбут ойууругар баран кэлэр бүтэһик баҕа санаатын эппит.

Куоппатын диэн кинини хас да киһи арыаллаан барсыбыт эрээри, ойуур ортотугар тиийээттэрин кытта кыыс сүтэн хаалбыт. Арай ханна тиийэллэрэ биллибэт инчэҕэй суоллар хаалбыттар.

Билигин үһүйээн баар: Flatford дэриэбинэҕэ самыыр түстэҕинэ кыыс халлаантан түһэр уонна дэриэбинэни кэрийэр, инчэҕэй суоллары хаалларар.

Написат Алиева,

7 «Г» кылаас,

Махачкала к.,

Дагестан өрөспүүбүлүкэтэ