Остуоруйа кудуга

Ааптар - Мусьяна Сосина

КЫҺЫҤҤЫ ХОҺООННОР

кыһыҥҥы хоһооннорго

 Кыһын уратыта

Кыһыны таптыыбын,

Хаар түһэр үҥкүүтүн,

Күн хаарга сүүс араас

Өҥ тиһэр сырдыгын.

Курустаал тэлгэтэн

Муус күөлгэ турбутун,

Хаар түспүт суолугар

Оһуордуу хаамарбын.

Таптыыбын кыһыҥҥы

Айылҕа кэрэтин,

Дьыл кэмэ ураты

Алыбтаах көстүүтүн.

 

КЫҺЫҤҤЫ ООННЬУУЛАР

Таһырдьа тымныйбыт,

Кыһыммыт дьэ кэлбит.

Оҕолор мустаммыт,

Сырылыы барыахпыт.

Халыҥнык таҥнаммыт,

Салааска соһуохпут,

Хаарынан бырахса

Иллээхтик оонньуохпут.

Муус турбут күөлүгэр,

Хаҥкылыы сырсыахпыт.

Хаар киһи оҥорон

Эргиччи хаамсыахпыт.

 

ХААР КИҺИ

Оҕолор таһырдьа тахсаннар,

Сибиэһэй салгыҥҥа оонньууллар.

Халыҥнык таҥныбыт буоланнар,

Кинилэр тымныыга тоҥмоттор.

Кыра хаар улаатар мээчиги,

Суол устун эргитэ сүүрэллэр.

Улахан хаар киһи оҥорон,

Астынан үөрэллэр-көтөллөр.

"Хорсун хаар киһибит туруоҕа,

Саҥа дьыл кэлэрин кэтиэҕэ,

Тымныыттан толлубат доҕорбут,

Таһырдьа оонньоһор оҕобут.

 

СААСКЫ ХОҺООННОР

сааскы хоһооннор 1

Ньургу, Ньургу, Ньургуһун.

Сааскы күммүт сардаҥата,

Чалбахтарга мэниктээтэ,

Ойуоккалаан сырыста,

Сүүрүктэрдиин саһыста.

Ньургуһуну көрбүтэ,

Олус, олус үөрбүтэ,

Иэдэһиттэн имэрийэн,

Күүскэ сыллаан ылбыта.

Ньургу, Ньургу, Ньургуһун,

Күн мичээрин оҕото,

Сырдыгынан сандааран,

Алаастарбын толордо.

Сааскы күммүт бэлэҕэ,

Симик, истиҥ мичээрэ,

Сахам сааһын кэрэтэ,

Ньургуһун сибэккитэ.

 

Ньургуһун

☀☀☀

Маҥнайгы сибэккилэр,

Хонууга тыллыбыттар.

Саһарчы мичээрдээннэр,

Дойдубун киэргэппиттэр.

☀☀☀

Ньургуһуну үргээмэ,

Үрдүнэн атыллаама.

Чуумпураҥҥын одуулаа,

Кэрэкэтин кэрэхсээ.

☀☀☀

Ньургуһун сибэкки үүммүтүн,

Хоһооммор этиэхпин баҕардым,

Нап-нарын, сэмэй бэйэтин,

Эйиэхэ тэҥниэхпин санаатым.

☀☀☀

Ньургуһунум барахсан -

Чурулуур сүүрүк аргыстаах,

Чап-чараас хаар олбохтоох,

Сааскы күн сылааһа мичээрдээх,

Сырдыкка талаһар майгылаах.

 

ТАММАХТАР

Күн сырдык сардаҥата,

Үрүҥ хаары уулларда.

Дьэҥкир, күндү таастары,

Эргиччи ыспахтаата.

Сүүрүк буолан сырсаллар,

Мэнигийээн таммахтар.

Куоталаһа сүүрэллэр,

Сандаарыһа күлсэллэр.

Чалбахтарга эккирээн!

Сүүрүктэргэ сүүрэлээн!

Сааскы сырдык күннэри,

Ыллыы-туойа уруйдаан!

💧💧💧

Топ, топ, топ таммахтар

Ыстаҥалыы оонньууллар.

Кырыыһаттан түһэннэр,

Мэнигилии сырсаллар.

 

САЙЫҤҤЫ ХОҺООННОР

КЫРАЧААННАРГА ХОҺООННОР

сайыҥҥы хоһоннор

НЬЭЭМ-НЬЭЭМ

Сарсыарда эрдэ уһуктар,

Киэһээ эрдэ утуйар.

Ньээм-ньээм сибэкки

Күн балтыта эбиккин.

 

ДЬӨЛҮҺҮӨН СИБЭККИТЭ

Дьөлүһүөн сибэккитэ,

Тыа саҕатыгар үүммүт.

Сэргэх, кэрэ бэйэтэ,

Айан суолун киэргэппит.

 

БАҔА БАТАҺА

Баҕа батаһа сибэкким

Олус даҕаны кэрэҕин.

Сииктээх сири талаҥҥын,

Өлгөмнүк да үүнэҕин.

САЙЫНЫ ТАПТЫЫБЫН

🌞🌞🌞

Сайыны таптыыбын,

Сайыны күүтэбин.

Сөтүөлүү сүүрэрбин,

Дуоһуйа оонньуурбун.

🌞🌞🌞

Сибэкки-бастыҥа,

Төбөбөр кэтиэҕим.

Күн күбэй ийэбэр

Утары сүүрүөҕүм.

🌞🌞🌞

Чыычаахтары үтүктэн,

Чырып-чырып ыллыаҕым.

Илиилэрбин саратан,

Кынаттанан көтүөҕүм.

 

КҮҺҮҤҤҮ ХОҺООННОР

күһүҥҥү хаартыскалар

Мин тылым - мин күүһүм.

Төрөөбүт тылбынан

Ыраастык саҥарыам,

Урааҥхай омукпун

Уруйдаан айхаллыам.

Төрдүбүн, төрүппүн

Үөрэтэн билиэҕим,

Төрөөбүт дойдубун

Киэн тутта ааттыаҕым.

Мин тылым - күлүүһүм,

Сүүс үйэ үөрэҕэр!

Мин тылым - мин күүһүм

Мин көтөр кынатым!

 

Мусьяна Сосина 03.02.2021 сыл.