Остуоруйа кудуга

Ааптар: Анна Колосова

Үлэ киһини киэргэтэр

           (Үгэ)

Улар

Тииҥ
Барҕа баай тыа үйэлэргэ суугунаан,
Үтүөмсэх үөттэрин үҥкүүлэтэн,
Хараҥа харыйаларын хамсатан,
Тыалга бигэнэ, нуоҕайа турара.

Тииттэн, тииккэ тииҥчээн ойуоккалыыр,
Тула көтө сылдьан холоруктанар,
Тугу эрэ гынан букунуйар.

Аттыгар уойбут улар кэллэ,
Модороон,модьу моойун уһатан,
Кып -кыһыл хааһын түрдэһиннэрэн,
Ол бу диэки олоотуу олорон,
Маннык саҥалаах-иҥэлээх буолла:
---- Тииҥ,эт эрэ миэхэ үөлээннээҕиэм,
Самаан сайын хаарыан кэрэ күннэрин,
Тоҕо маннык үлэлээн барыыгын,
Ыран,дьүдьэйэн бүтээхтээбиккин,
Миигин көрүүй эрэ,хайдахпыный?

Түүм тубуста дии,көпсөркөй буолла,
Этим-сииним силигилии ситтэ,
Талбыт аспын таалалыы аһыыбын,
Тиэрэ уойан, улаатан абыранным,
Көҥүл көччүйэбин,сынньанабын,
Ол иһин ыалдьыбаппын,ырбаппын,
Бэл, соҕуруу да көтөн сордоммоппун.

Онуоха тилигирэс тииҥ этэр:
--- Улар убайыам,үлэлээтэххэ,
Аһыыр аһын мэлдьи баар буолар,
Доруобуйан биллэ  тупсар,
Этин-сиинин эрчиллэн эрчимирэр,
Күүс-уох, сэниэ  эбиллэр эбит,
Үлэ киһини киэргэтэр эбээт.
Улар ити өйдөөх тыллары истэн,
Өһүргэнэн көтөөрү гыммыта,
Бэйэтин ыйааһынын кыаммакка,
Сиргэ умса хоруйа түспүтэ,
Киһиргиирэ ханан да суох буолбута.

“Улар мэйии” уонна “тииҥ мэйии”

Уратылара итиннэ буоллаҕа.