Остуоруйа кудуга

Ааптар: Анна Колосова

Ытанньах былытчаан

(Остуоруйа)

Былытчаан
     Күп -күөх халлаан урсунугар араас быһыылаах -таһаалаах былыттар усталлар. Олор быыстарыгар биир наһаа ытанньах былытчаан баар эбит.  Кини туох да төрүөтэ суох ытыыра. Хараҥа дьүһүннээх ,күлэр-үөрэр диэни билбэт,наар ытаан маккырыыр  идэлээх эбит. Эдьиийдэрэ,убайдара араас ыкка,куска кубулуйаннар уоскута сатыыллара, ол аайы ытанньах былыппыт өрө барара. Араас кэрэ дойдулары кэрийэ устубуттар , былытчаан ону да көрөн аралдьыйбатах, ытыыра өссө бэргээбит.
     Биирдэ ытанньах былытчаан буоларын курдук,эмиэ  ытыы  сырыттаҕына, күн  истэ сатаан баран эппит : "Эн ытаан бүт, мин эйиэхэ биир дьиктини көрдөрүөм"- диэбит уонна эйэҕэстик мичээрдээбит. Ону истэн ытанньах былыппыт хап- сабар дьиибэргээбит:" Туох дьиктитин, дьиибэтин этэҕин?" Онуоха күн эппит: " Оччоҕо ытаан бүт уонна тулаҕын болҕойон көр". Ытанньахпыт хараҕын уутун соттон баран тохтообут уонна кэтэспит. Ол кэмҥэ күн сандаара тыкпытыгар халлааҥҥа сэттэ өҥнөөх дьэрэкээн кустук тахсан кэлбит. Ытанньах былытчаан ону көрөн сирэйэ-хараҕа сырдаан кэлбит. Кустугу эккирэтэ оонньообут, ытаабат буолбут.