news

        Ахсынньы аан-даам тымныытын бүрүммүтүнэн, Бүлүү улууһун I Күүлэт нэһилиэгэр үөрүүлээх тэрээһин буолан ааста.

        Ол курдук, Саха АССР оскуолаларын үтүөлээх учууталын, Аҕа дойду сэриитин кыттыылааҕын, бэтэрээнин, бойобуой эписиэри, гвардия старшай лейтенанын, “Аҕа дойду сэриитин I истиэпэннээх”, “Кыһыл Сулус” уордьаннар уонна икки бойобуой мэтээллэр кавалердарын, үөрэҕирии бэтэрээнин, нэһилиэк бочуоттаах олохтооҕун Прокопий Алексеевич Павлов (1919-1986) төрөөбүтэ 100 сылын бэлиэтиир тэрээһин үрдүк таһымнаахтык тэриллэн ыытылынна.

pavlovv

        Прокопий Алексеевич Павлов аатын I Күүлэт уопсай үөрэхтээһиҥҥэ орто оскуолата уонна нэһилиэк биир тупсаҕай оҥоһуулаах уулуссата сүгэр. Тэрээһин П.А.Павлов аатынан оскуолаҕа үөрүүлээх илиниэйкэнэн саҕаланна. Манна оскуола дириэктэрэ, Саха Өрөспүүбүлүкэтин үөрэҕириитин туйгуна Сардаана Владимировна Томская, I Күүлэт нэһилиэгин баһылыга Айаал Петрович Новиков, Прокопий Алексеевич уола, Арассыыйа култууратын үтүөлээх үлэһитэ, Саха сирин норуодунай артыыһа, Федор Волков аатынан Арассыыйа Бырабыыталыстыбатын бириэмийэтин лауреата Алексей Прокопьевич Павлов маннык тэрээһин үүнэр көлүөнэни патриотизм тыыныгар иитиигэ, аҕа көлүөнэ албан ааттаах олохторун, кинилэр дойдуларын туһугар хаалларбыт кылааттарын умнубат буолууга, сүгүрүйүүгэ, кинилэринэн киэн туттууга үөрэтэрин бэлиэтээтилэр.

        Үөрүлээх илиниэйкэ кэнниттэн оскуола П.А.Павлов аатын сүгэрин туоһулуур мэҥэ бэлиэни аһыы сиэрэ-туома ыытылынна.

immm

        Салгыы 1974 сыллаахха оскуоланы бүтэрбит выпускниктара мустаннар оскуола XI-с, X-с, IX-с кылааста үөрэнээччилэрин кытта көрүстүлэр. Бу көрсүһүүгэ үгүс көлүөнэ тапталлаах, сүгүрүйэр учууталларын - кэргэннии Прокопий Алексеевич Павлов уонна Ирина Герасимовна Николаева тустарынан истиҥник-иһирэхтик  ахтан-санаан аастылар.

 Ол кэнниттэн “Үтүө быһыы үйэлээх, кэрэ санаа кэскиллээх” диэн учууталлар П.А Павлов уонна И. Г. Николаева сырдык ааттарыгар анаммыт I Күүлэт орто оскуолатын оҕолорун кыттыылаах уус-уран ааҕыыҕа бэстибээл-күрэх үрдүк таһымҥа, олус ситиһиилээхтик ыытылынна. Уус-уран ааҕыы күрэҕэр 80-тан тахса оҕо кытынна.

stixi

        П.А.Павлов уонна И.Г.Николаева уоллара Арассыыйа култууратын үтүөлээх үлэһитэ, Саха сирин норуодунай артыыһа А.П.Павлов салайааччылаах дьүүллүүр сүбэ оҕолор үрдүк таһымнаах толорууларыттан улахан дуоһуйууну, астыныыны ыллылар. Оҕолору олус үчүгэйдик бэлэмнээбит оскуола учууталларыгар, оҕолорго маннык айымньылаахтык сыһыаннаһалларын, оҕолорго бары өттүнэн дэгиттэр сайдыыны биэрэргэ улахан баҕалаахтарын иһин, дьүүлүүр сүбэ салайааччыта А.П.Павлов барҕа махтал тылларын эттэ.

        Тэрээһин өссө биир үөрүүлээх түгэнэ “Учуутал, эн үрдүк ааккар сүгүрүйэн” диэн учуутал үтүө аатын үрдүктүк тутан, оҕону үөрэтиигэ-иитиигэ олохторун барытын анаабыт П.А. Павлов уонна И. Г. Николаевна тустарынан саҥа тахсыбыт кинигэ сүрэхтэниитэ буолла. Бу киниигэни П.А.Павлов аатынан I Күүлэт орто оскуолатын учууталлара - Саха Өрөспүүбүлүкэтин үөрэҕириитин туйгуна, нуучча тылын уонна литэрэтиирэтин учуутала Р.И. Иванова уонна Саха Өрөспүүбүлүкэтин үөрэҕириитин туйгуна, төрүт култуура учуутала Т.П. Гуляева хомуйан-таҥан оҥорбуттар.

knigi

 

        Кинигэ сүрэхтэниитэ олус истиҥник-иһирэхтик алта түһүмэҕинэн ыытылынна.

Бу маннык үрдүк үөрүүлээх кинигэ сүрэхтэниитин кэнниттэн, тута Саха Өрөспүүбүлүкэтин Үүнэр көлүөнэтин судаарыстыбаннай тыйаатыра “Учуутал, албан аатын, ааттаннын...” диэн П.А. Павлов уонна И.Г. Николаева олохторун, үлэлэрин көрдөрөр тыйаатырдыы дьүһүйүүнү көрдөрдө. Прокопий Алексеевич Павлов, Ирина Герасимовна Николаева оруолларын Үүнэр көлүөнэ тыйаатырын артыыстара Кирилл Рожин уонна Анастасия Иванова олус итэҕэтиилээхтик оонньоотулар.

art1

П.А.Павлов уонна И.Г.Николаева оҕолоро, сиэннэрэ, хос сиэннэрэ I Күүлэт нэһилиэгин баһылыгар А.П.Новиковка, 1 Күүлэт орто оскуолатын дириэктэригэр С.В. Томскаяҕа, оскуола бары үөрэтэр-иитэр үлэһиттэригэр, үөрэнээччилэригэр, I Күүлэт нэһилиэгин бары ытык мааны олохтоохторугар аҕаларын, эһэлэрин, хос эһэлэрин төрөөбүтэ 100 сылын үрдүк таһымнаахтык  бэлиэтээбиттэригэр барҕа махталларын тиэрдэллэр.

Үүнэр көлүөнэ тыйаатырын пресс-киинэ.